استرجاع شريط الذكريات

صباح الخير
بالرغم إني للآن ما نمت إلا إني أصبح على كل من دخل مدونتي وقاعد الآن يقرا كلامي

تدرون ليش أنا للآن ما نمت لأن بكره عندي إجازة من الدوام وكنت حابه أتسلى ساعة على النت قبل ما أنام وبدون ما أدري عن نفسي لقيت هالساعة تجر وراها ساعة ورى ساعة لغاية ما أذن الفجر وأنا ما نمت
:s
قعدت في هالوقت أسترجع بدايتي بالنت أول ما دخل عندنا النت بالسعودية قبل 7 سنوات كانت الشهرين الأولى مجرد تصفح مواقع واكتشاف وش هالشي اللي اسمه انترنت وكان أهم موقع في ذيك الفتره هو "أين"
عليميّة وما عندي خبرة وأول موقع سمعت عنه صرت أسنتر عليه لساعات طويلة وأذكر إني دخلت من خلاله على مواقع الجامعات اللي ذاك الوقت كانت مواقع بدائية مجرد عرض للتخصصات وأسماء أعضاء هيئة التدريس لا أكثر ولا أقل هذا بالنسبة للجامعات اللي لها مواقع أصلاً لأن الأغلبية لسى كانت تحت الإنشاء.
بعد كذا عرفت التشات وصار إدمان التشات عندي مزمن لدرجة قلة النوم والعزلة عن الأهل ويمكن لصغر سني ذاك الوقت وقلة تجربتي أثر في ذلك - وهذا ليس تبرير للخطأ بكل تأكيد -قعدت فترة على هالحال ومليت وقرفت من كل شي إسمه تشات , لكن الموقع تبع التشات كان فيه منتدى - الله لا يردهم لا هم ولا تشاتهم ولا منتداهم - لكن ما أنكر إن كان لهالمنتدى فضل في تعليمي طريقة الكتابة واستخدام الأكواد.
عن طريق الصدفة وصلني موضوع من منتدى الساخر وكان نقلة نوعية بزاوية 180 درجة صار الانترنت بالنسبة لي يعني الساخر سجلت فيه وشاركت بفعالية ونشاط وهذا صادف انتهائي من مرحلة دراسية يعني كان عندي وقت فراغ يسمح بالكتابة والمتابعة لبعض ما يكتب , واليوم على سبيل المثال كنت أقرأ ردودي ومواضيعي وأقرأ تفاعل الناس اللي هناك معي والكم الهائل من اليوزرات اللي عرفتهم عن طريق الساخر واللي أثروا فيني وأثرت فيهم أكيد وكمان الفرق بين تفكيري الآن وبين تفكيري قبل واللي مدري هل هو نضوج أو مجرد تغيير طبيعي مع تراكم التجارب والخبرات وتغير الوقت.
المهم بعد مشوار حافل بالساخر دام تقريباً 3 سنوات صرت أكتفي بالمراقبة اليومية عن بعد واللي صارت أسبوعية فشهرية والحين أظنها تبي تصير سنوية.
مليت من الكتابة ومليت من التعليق على المواضيع ومن تعكير المزاج اللي يصير بعد كل حوار محتدم في المنتديات بالرغم إن الأمر لا يعدو كونه حوار مع أشباح لا يعرفوني ولا أعرفهم لكن بالرغم من كذا كان مزاجي يتغير ويتبدل حسب نوعية الردود وكيفيتها يعني تعلقت بيوزري في المنتدى أكثر من اللازم وصرت أحس إنه يمثلني أنا فلانه بنت فلان في الواقع كان يصعب علي في بعض الأحيان أن أفصل بين عاطفتي كواقع والأفكار اللي أعبر عنها من خلال يوزري وأعتقد الغالبية من مستخدمي النت مرت بهذا الوضع.

على العموم فتره وراحت اعتزلت بعدها المنتديات والماسنجر وسويت لي قروب في موقع الياهو صار النت في هالفترة هو هذا القروب , حبيت هالقروب من جد حبيته وعطيته الكثير من وقتي وجهدي ألف وأدور في المواقع والقروبات العربية والأجنبية عشان أبحث عن الجديد والمميز وأرسله لقروبي العزيز واللي وصل عدد أعضاؤه ما شاء الله فوق الثمانية آلاف عضو من جميع أنحاء العالم وبدون مبالغة حتى كان فيه من كوريا.
جت بعدها فترة ما قدرت أدخل فيها النت وكنت أطلب من أختي إنها تدير القروب في هالفترة وهذا خلاني ابتعد عنه شوي ويقل تعلقي فيه . لكن يوم فضيت له ورجعت ادخل النت من جديد تفاجأت بعد فترة إني ما أقدر أدخل الايميل اللي أدير منه القروب وبعدها بكم يوم صار القروب ذكرى ولا وجود له على الخارطة العنكبوتيه وبدون سبب.
:(
حزنت بقووووة لكن تخطيت حزني ولله الحمد بسررررعه ربما لانشغالي بما هو أهم وأسمى ويمكن لإحساسي بأن كل مجهود أبذله هو جهد ضائع .
:)
صار دخولي للنت مقتصر على قراءة الصحف اليومية بداية بكاريكاتير الهليل وانتهاء بالعربية نت وإيلاف ولا يهون التداول الالكتروني.

إلى أن وصلت وعن طريق الصدفة إلى عالم المدونات وأعجبني التفاعل في الردود والتعليقات وإن كان الأمر لا يخلو من الشللية إلا أنه ذكرني بسابق عهدي في الساخر فأنشأت هذه المدونة تحمست في البداية وبدأ الحماس يقل شيءً فشيءً حتى كاد أن يختفي .
:s

لكن اليوم بعد ما استرجعت مشواري في النت ذات صفاء أبيت أن تمر هذه الذكريات دون تدوين بالرغم من كثرة الغبار الذي يزكم الأنوف في مدونتي المهجورة إلا أن ذلك يتماشى مع هذه التدوينة " المغبرة" إن جاز التعبير

طبعاً هذا ليس كل شيء -فيتخلل هذا وذاك الاستخدام الدراسي للنت والتبادل للرسائل الجميلة مع أصدقائي وأقربائي والبحث الالكتروني والاستخدام في العمل فكلامي هنا أقصد به الجانب الترفيهي فقط.

ختاماً لكل من مر من هنا ووصل إلى هذه النقطة أقول شكراً يكفيني قراءتك للموضوع وإن لم تسجل حضورك.
تمسون على خير
wafa :)