الممشى

هالأيام الجو مرررررة حلو والرياضة هذا وقتها طبعاً لأن الصيف قرّب وهالكيلويين اللي زدناهم بالشتاء وأكلاته الدسمه صار لازم ننزلهم

فقررت أروح الممشى مكان حلو -بس مو مره له عيوبه يعني -لكن يفي بالغرض إلى حد ما

الممشى عالم ثاااااااني أو بشكل أصح مجتمع صغير فيه كل شرائح المجتمع ومن كل الأعمار

عادة أعمل رياضتي بالنادي لكن بحكم الجو الحلو صرت أداوم على زيارة الممشى بشكل شبه يومي وتدرجت لغاية ما صرت أمشي مدة لا بأس بها

الممشى فيه مجموعة من الناس همهم بس إنهم يناظرون خلق الله - جالسين على الكراسي - ويعلقون على الرايح والجاي

:D وناس ثانين همهم لفت انتباه هاللي جالسين

إما بالتمايل والتثني بالمشي أو بالإبتسامات اللي يوزعونها يمين وشمال

وناس كثيرين - مثلي - جايين للمشي منهم الكبيــر في السن ومنهم الشاب والمريض ومنهم الرياضيين طبعاً وكمان أطفال يعانون من مشكلة السمنة

:D لفت انتباهي رجل لابس ومرسّم ومعاه زوجته يمشي بالممشى وهو متلثم

الظاهر مايبي أحد يعرفه أو مدري وش قصته بالضبط ؟؟

كمان لفتوا انتباهي ثلاث شباب أعمارهم 20-21 أو بالكثير 22 لابسين الثوب وظابطين ومنشين الغتره ويمشون بالممشى

وأنا يوم شفتهم قلت في نفسي وش يبون ذولا من الممشى وهم بهاللبس؟؟

وفيما أنا أستغرب أشكالهم ولبسهم مرت جنبهم سيارة وقال سائقها بصوت عالي "يا بدووووووووووووو" يقصدهم

أنا صراحة عجزت أتمالك نفسي من الضحك

=D

والحقيقة إن البدو من الناس إللي ما يتأقلمون بسرعة ولا يندمجون مع الحضارة والتطور بشكل كبير مهما بلغ مستواهم التعليمي ومهما بلغت ثرواتهم

وهذا مو بس عندنا في السعودية حتى في بعض دول الجوار تلقى البدو لهم نمط حياة وخصوصية

وصعب إنهم ينصهرون ويندمجون في المدنية والتحضر بسهولة كما هو الحال في الإمارات على سبيل المثال لا الحصر.

على العموم المشي رياضة مررره حلوه والأحلى منها إنك تداوم عليها .

وأنا شخصياً من مداومتي على المشي كمان تعودت على وجوه اللي يمشون كل يوم فصرت أفقد فلانة اللي ما أعرف وش اسمها ولا أدري مين هي أصلاً واللي تمشي مع صديقتها السمرا وصرت أفقد السوبربان العودي اللي يدور حول الممشى ومشغل أغنية ( عدنان يتحدى المخاطر ) أو (أمي كم أهواها ...) :D

حتى زميلات العمل أفقدهم إذا غابوا في يوم مع إن لقائنا بالممشى لا يتعدى رفع اليد بالتحية بدون ما نتوقف عن المشي

وبالرغم ان الممشى قصير كيلو ونصف تقريباً وفيه نسبة من الشباب المزعجين والسيارات المزعجة كذلك إلا إنه فرصة لتحريك الدورة الدموية ويؤدي الغرض ونظراً لعدم وجود بدائل فهو المكان الأفضل
بحدّث الموضوع وأحط لكم صورة الممشى إذا صورته إن شاء الله